Para o curso escolar 2022-2023 o programa realízase nos CEIP Otero Pedrayo, Alfredo Brañas e, por primeira vez, en Caión
O servizo de apoio á conciliación da vida persoal, laboral e familiar que se presta a través do Programa Harmoniza: Conciliando na Laracha alcanza os 108 usuarios. Desde o inicio do curso escolar 2022-2023 está a rexistrar un rotundo éxito tal e como reflicten as cifras de usuarios, que aumentan cada ano con respecto aos anteriores.
Dos 108 usuarios, 80 son alumnos do CEIP Otero Pedrayo, 22 do CEIP Alfredo Brañas de Paiosaco e outros 6, do CEIP de Caión. Precisamente este último centro é a gran novidade deste ano, xa que estrea o servizo. É a primeira vez que alcanzou o número mínimo de usuarios establecido.
O Concello aposta desde hai anos polo Programa Harmoniza: Conciliando na Laracha co obxectivo de responder ás necesidades das familias. As mesmas están derivadas das dificultades que presentan para compatibilizar os seus horarios laborais cos escolares dos fillos. A atención dos menores está a cargo de persoal cualificado nos propios colexios antes do inicio das clases, desde as 7:00 horas. Realizan actividades lúdicas e educativas tendo a opción de recibir un almorzo saudable. Segundo as necesidades de conciliación de cada usuario, o servizo presenta as modalidades de mes completo, días soltos ou usuario ocasional.
