Chola, a IT girl, Go On!e Mostellaria son as pezas que forman o programa no centro sociocultural de Paiosaco
O Concello presenta o programa da décima edición do ciclo de teatro de Paiosaco. A Primavera Teatral, afianzada como un dos grandes referentes da programación cultural municipal, desenvolverase ao longo do mes de abril. Será no auditorio do centro sociocultural desa localidade e constará de tres espectáculos. En todo caso, a celebración do programa e as condicións de acceso estarán suxeitas a posibles cambios. Dependerá da situación epidemiolóxica e das medidas sanitarias e sociais que poidan establecer as autoridades competentes.
A día de hoxe a situación sanitaria limita a asistencia de público ao trinta por cento do aforo do auditorio do centro sociocultural da Porta Santa. Ademáis, estipula a obrigatoriedade de que as persoas que ocupen o patio de butacas permanezan coa máscara posta durante toda a función. Debido á limitación da liberdade de circulación das persoas en horario nocturno, as obras comezarán ás 20:00 horas.
Días e obras
- A primeira cita será o venres día 9 con Chola, a IT Girl. Laura Valverde porá en escena á protagonista da peza, unha mecánica de coches, blogueira e youtuber galega que é contratada por un teatro para presentar o seu monólogo.
- A semana seguinte, o venres 16, a compañía Malasombra Produccións chega con Go On!, unha comedia protagonizada por Xoque Carbajal e Jouse García e dirixida por Marcos Orsi. A peza percorre e parodia os costumes, refráns, cancións e a cultura galega en xeral mediante dous intrépidos exploradores.
- O ciclo pecharase o venres 23 cunha versión de Mostellaria, a comedia clásica de Plauto, adaptada pola compañía teatral Corzo Producciones.
Todas as funcións serán con entrada gratuíta por orde de chegada e ata completar o aforo máximo permitido. Colabora co Concello na organización da Primavera Teatral de Paiosaco a Deputación da Coruña.
