As entidades que poden solicitar subvención ata o 4 de novembro, deben desenvolver a súa actividade no termo municipal da Laracha e carecer de fins de lucro
A data de presentación é ata o 4 de novembro deste ano. O Boletín Oficial da Provincia (BOP) da Coruña publica as bases da convocatoria de subvencións municipais do Concello da Laracha. Están dirixidas a entidades culturais, deportivas, educativas e deportistas individuais. Esta liña de axudas ten por finalidade cooperar no financiamento dos gastos de organización e desenvolvemento de actividades realizadas desde o 1 de xaneiro ata o 11 de decembro.
Do mesmo xeito que nos anos precedentes, os catro apartados de actuacións subvencionables que se recollen na convocatoria corresponden a:
- Promoción de actividades educativas: actuacións culturais ou deportivas a realizar nos centros educativos públicos da Laracha. Ben polas asociacións de alumnos ou de pais e nais ou mesmo polos propios centros educativos.
- Promoción de actividades culturais: entendendo por elas calquera acción referida á conservación, promoción e divulgación dos valores culturais.
- Promoción de actividades deportivas: neste apartado inclúense as escolas deportivas, cursos, competicións, campus e todas as actividades relacionadas co fomento do deporte en xeral.
- Deportistas individuais: a través desta achega económica, o Concello da Laracha pretende apoiar aos seus deportistas máis importantes. Cunha subvención para sufragar os gastos das viaxes ou da adquisición e o mantemento do seu material deportivo. Á hora da concesión da subvención, valoraranse os éxitos persoais de cada deportista nas competicións en diferentes ámbitos xeográficos.
Sin fins de lucro
As entidades beneficiarias deben desenvolver a súa actividade no termo municipal da Laracha e carecer de fins de lucro. Aos deportistas individuais requíreselles estar empadrados no concello cunha antigüidade mínima de dous anos. Tamén dispoñer de licenza deportiva vixente, non realizar a súa actividade como parte dun club, asociación ou entidade. E, ademáis, participar en competicións de ámbito autonómico, nacional ou internacional.
Estas subvencións municipais son compatibles coas convocadas por outros organismos. Lembrar que o prazo de solicitude de vinte días naturais permanecerá aberto ata o día 4 de novembro. Publicación da convocatoria no BOP: https://bop.dicoruna.es/bopportal/publicado/2020/10/15/2020_0000007130.html
