O rexistro de pequenas e medianas empresa e de persoas autónomas é para futuras contratacións
O Partido Socialista da Laracha leva ao pleno de maio una moción para crear o rexistro de empresas, pequenas e medianas e persoas autónomas do Concello da Laracha. «Neste poderían inscribirse as empresas interesadas con carácter facultativo, sen que en ningún caso poida resultar tal esixencia como obrigatoria. Igualmente é para establecer criterios de simplificación de trámites, evitando repeticións de acreditación documental innecesaria nos distintos contratos que se
liciten», di Palomi Rodríguez, voceira do grupo no Concello da Laracha.
A intención é acordar no proximo pleno:
- Instar ao Goberno Municipal á creación dun rexistro municipal de empresas, Pemes e persoas autónomas co seu regulamento de funcionamento, ordenado polas diferentes áreas e cos requisitos oportunos para que calquera que os cumpra poida formar parte do mesmo.
- Instar ao Goberno Municipal para que se dea publicidade e se creen as vías de comunicación oportunas para difundir este rexistro, posibilitando que toda empresa, Peme ou autónomo/a local que así o desexe poida formar parte deste rexistro sempre e cando cumpra os requisitos de dito regulamento de acordo co legalmente establecido.
- Unha vez elaborado o rexistro municipal antes mencionado, as empresas, pemes e persoas autónomas que así o desexen teranse en conta para a adxudicación de contratos menores dentro das posibilidades que dá a nova Lei 9/2017 do 8 de novembro de Contratación do Sector Público.
Encontros con entidades deportivas e culturais
Por outra banda, os socialistas da Laracha está a manter unha rolda de encontros coas diferentes entidades deportivas e culturais do municipio para coñecer de
primeira man as necesidades das entidades. Reuniuse con Juan José Fuentes, presidente do Laracha CF para coñecer, de primeira man, as necesidades desta entidade deportiva e os seus proxectos de futuro
O Laracha CF, unha entidade moi arraigada, mobiliza, desde a chegada da nova directiva, en setembro do 2020, a case un centenar de familias. Os clubs deportivos formativos, víronse enormemente afectados pola pandemia do COVID-19, sufrindo unha notable caída de ingresos, e precisan, nestes intres, un incremento das subvencións así como unha aposta polo mantemento e mellora das instalacións deportivas municipais.
