O Concello é pioneiro en Galicia na implantación do contenedor marrón da recollida selectiva segundo Sogama e a Xunta de Galicia
O tenente alcalde e edil de Medio Ambiente, José Ramón Martínez Barbeito, representou ao Concello da Laracha na xornada orientada á implantación do contedor marrón da recollida selectiva. Foi onte no municipio de Cervo. Sogama e a Consellería de Medio Ambiente, Territorio e Vivenda da Xunta de Galicia organizaron o evento. O acto enmarcouse no programa de conmemoración da Semana Europea da Prevención de Residuos.
O Concello foi convidado como municipio pioneiro na implantación da quinta fracción de recollida selectiva e como exemplo de xestión dos colectores marróns de orgánicos. Por iso, Martínez Barbeito detallou as accións informativas e divulgativas levadas a cabo na Laracha desde meses antes da posta en marcha do servizo en febreiro de 2020. Ademáis destacou o bo uso por parte da cidadanía dos colectores marróns. A xornada concluíu cunha visita guiada ás obras da planta de biorresiduos que se está a construír en Cervo.
Sumarse ao programa
Cabe lembrar que o contedor marrón está implantado nos tres núcleos urbanos do municipio (A Laracha, Paiosaco e Caión) e na urbanización Monte Claro de Cabovilaño. Calquera persoa que desexe sumarse ao programa, debe solicitalo no Concello ou cubrindo o formulario na web municipal. Para facilitar a separación dos residuos orgánicos recibirán un “kit de voluntariado marrón” consistente nunha chave para abrir os contedores, un cubo ventilado e bolsas compostables.
