O prazo de inscrición ao programa permanece aberto en gran parte das propostas infantís e xuvenís
A primeira das propostas incluídas no programa municipal de verán de actividades culturais e deportivas xa está en marcha. Hoxe, comezou a desenvolverse o campus de fútbol que se leva a cabo por décimo terceira vez. Os sesenta participantes foron divididos por grupos de idade. Os de cinco a dez anos realizaron a actividade no Campo Municipal da Laracha e os de once a dezaseis anos, no Campo A Porta Santa de Paiosaco. En ambos casos, o campus terá lugar a diario ata o venres en horario de 10:30 a 13:30 horas.
O Concello asume integramente os gastos da actividade, polo que a inscrición foi gratuíta para os participantes. Todos eles están a realizar, baixo a supervisión de técnicos e monitores especializados, diferentes exercicios lúdico-deportivos. Sempre coa práctica do fútbol como marco referente. Ademais de divertirse, os rapaces poden mellorar as súas calidades físicas, técnicas e tácticas. Hoxe os nenos e os monitores recibiron a visita do alcalde, José Manuel López Varela, e das concelleiros Rocío López e Pablo Cambón.
Outras actividades
Lembramos que o prazo de inscrición permanece aberto na maior parte das actividades do programa de verán. Soamente están pechados en aquelas que teñen todas as prazas outorgadas por orde de inscrición cubertas e no campamento summer camp. As prazas dispoñibles serán adxudicadas no sorteo público que se realizará este mércores ás 12:00 horas na Casa da Cultura da Laracha.
Tanto acudindo ao Concello como cubrindo o formulario dispoñible na web municipal as persoas interesadas aínda poden apuntarse a actividades infantís:
- Campus de baloncesto (26 ao 30 de xullo no pavillón Municipal da Laracha)
- Humor Amarelo na Coruña (14 de xullo)
- Inchable banana acuática en Gandarío (3 de agosto)
- Visita ao museo etnolúdico de Ponteceso (20 de agosto)
Para o público xuvenil e a adulto aínda hai prazas dispoñibles en todas as actividades:
- Barranquismo no río Almofrei (5 de agosto)
- Kaiak e paddle surf en Gandarío (12 de agosto)
- Humor Amarelo na Coruña (17 de agosto)
- Surf en Caión (26 de agosto)
- Obradoiros de beatbox, breakdance e freestyle football que terán lugar o 10 de setembro na Laracha durante a celebración da xornada de cultura urbana
