O Concello da Laracha organiza o programa para achegar as artes escénicas á cidadanía e apoiar ao sector cultural
Todos os anos o Concello organiza nese mes o programa Venres Teatrais con cinco das mellores pezas do panorama galego. En todo caso a celebración do programa e as condicións de acceso estarán suxeitas a posibles cambios en función da situación epidemiolóxica.
A día de hoxe a situación sanitaria limita a asistencia de público ao cincuenta por cento do aforo da Casa da Cultura. Ademáis, estipula a obrigatoriedade de que as persoas que ocupen o patio de butacas permanezan coa máscara posta durante toda a función. Debido á limitación da liberdade de circulación das persoas en horario nocturno, decidiuse adiantar a hora de inicio das funcións. As obras comezarán ás 20:30 horas.
O Concello leva a cabo os Venres Teatrais co dobre obxectivo de ofrecer á cidadanía achegarse ás artes escénicas e de apoiar ao sector cultural, especialmente afectado pola crise do coronavirus.
Calendario
- A primeira cita será o venres día 6 con Vida de cans. Nova comedia paródica e metafórica da compañía ceense Talía Teatro. Dirixida a maiores de 13 anos de idade. Os actores Artur Trillo, Toño Casais e Dani Trillo protagonizan a obra, escrita e dirixida por Cándido Pazó.
- O venres 13 será a quenda para Bernarda, da compañía Malasombra Producións. A protagonista, interpretada por Luisa Merelas (coñecida polos seus papeis en Matalobos, Fariña e Casa Manola). Tras quedar viúva a mediados dos anos ‘70 pretende que todo continúe sendo igual que sempre. Ás actrices son Celia González e Esther Aja.
- A comedia Papa ser cancelas traerá o venres 20 á Laracha a Isabel Risco, Pedro Brandariz e Fran Rei. Tres xeniais “chefs” que preparan menús para diferentes personaxes entre o máis distinguido do panorama galego actual.
- O día 27 en Chola, a IT Girl Laura Valverde porá en escena á protagonista da peza. Unha mecánica de coches, blogueira e youtuber galega que é contratada por un teatro para presentar o seu monólogo ao máis puro estilo de show escénico youtuber.
- O pano dos Venres Teatrais pecharase o 4 de decembro con Soa. Un espectáculo protagonizado por unha muller maltratada física e psicoloxicamente á que dá vida a actriz Rogelia dos Outeiros. A peza, para maiores de 12 anos, está dirixida por Fran Rei. Inspirada no monólogo de Darío Fo La donna sola.
Todas as funcións serán con entrada gratuíta por orde de chagada e ata completar o aforo máximo permitido. Colaboran co Concello da Laracha a Deputación da Coruña e a Xunta de Galicia -Secretaría Xeral de Política Lingüística-. Programa FalaRedes 2020 e do Fondo de proxectos culturais Xacobeo 2021.
