Trátase da segunda fase do programa que permitiu a mozos laracheses visitar Venecia no pasado verán
O alcalde, José Manuel López Varela, recibiu en Caión aos participantes no programa de intercambio xuvenil El camino que nos une. Todos eles son mozos procedentes de Italia, Grecia, Lituania, Portugal e Letonia. Esta visita conforma a segunda fase do proxecto no que está a participar o Concello e que posibilitou que no pasado mes de xullo rapaces laracheses viaxasen a Venecia.
Precisamente desa localidade italiana procede gran parte da expedición. Son alumnos de Il Polo Tecnico Profesionale de Venezia “Vendramin Corner”. Trátase do centro de formación profesional no que cursan estudos de diferentes materias relacionadas cos sectores marítimo, mecánico e de atención sociosanitaria.
Na Laracha visitaron varios puntos do municipio e realizaron os actos oficiais na vila de Caión. O alcalde lles deu a benvida no centro sociocomunitario -acompañado polo presidente do GALP Costa da Morte, Evaristo Lareo- antes de proxectar un vídeo sobre o Concello e de visitar o Arquivo da Pesca.
Ademais da Laracha, durante a súa estancia de unha semana en Galicia tamén coñeceron Santiago de Compostela -incluíndo o Parlamento Galego e os Museos do Pobo Galego, Arte Contemporánea e das Peregrinacións-. Tamén percorreron un tramo do Camiño, a cidade da Coruña e os municipios de Santa Comba e de Fisterra. Hoxe teñen previsto celebrar un encontro co Conselleiro de Cultura, Educación, Formación Profesional e Universidades.
