A especialidade de pintura industrial en construción do obradoiro participa nun curso sobre Plataformas Elevadoras Móbiles de Persoal
As dúas especialidades do Obradoiro de Emprego A Laracha VII está en marcha desde finais do mes de outubro. A capacitación continúa avanzando na fase de aprendizaxe teórica imprescindible para que, a continuación, o alumnado traballador poida desenvolver as intervencións prácticas.
Despois de case dous meses desde o inicio da actividade, as persoas participantes xa completaron parte da formación teórica, tanto específica na súa correspondente especialidade como transversal en materias comúns. Sobre prevención de riscos laborais todo o alumnado recibiu unha formación complementaria en primeiros auxilios. Ademais, o grupo de pintura industrial en construción está a realizar un curso sobre o emprego de Plataformas Elevadoras Móbiles de Persoal. O mesmo consta de seis horas teóricas e outras oito prácticas. Precisamente esa fase práctica comezou hoxe xunto ao viveiro de empresas municipal do parque empresarial. O alcalde, José Manuel López Varela, e o concelleiro José Ramón Martínez Barbeiro, acudiron para interesarse polo desenvolvemento da actividade.
Este obradoiro de emprego ten unha duración total de nove meses, contando con 20 alumnos-traballadores –dez por cada especialidade. Lembramos que o obradoiro é o sétimo programa dual de formación e emprego que organiza o Concello da Laracha. Conta cun orzamento de 347.000 euros e é cofinanciado co apoio da Consellería de Emprego e Igualdade da Xunta de Galicia.
