O espazo canino foi habilitado na confluencia das avenidas Manuel Fraga e Bos Aires
A nova área de recreo canino está desde hoxe aberta para uso e desfrute da cidadanía larachesa e as súas mascotas. O Concello creou esta infraestrutura de titularidade municipal nunha parcela de 1.300 metros cadrados de superficie. Está situada na confluencia das Avenidas Manuel Fraga e Bos Aires do núcleo urbano da Laracha.
O acceso ao recinto conta con dobre porta e un valado perimetral, co obxectivo de evitar que os cans poidan escapar. Tamén conta cunha marquesiña con banco, ducha de arco, unha fonte de auga potable de dobre uso para persoas e mascotas, un dispensador de bolsas e un contedor de excrementos.
O ámbito de esparexemento foi dividido en dous espazos diferenciados e adaptados ás necesidades das diferentes razas de cans. Cada un deles dispón de elementos e xogos. Ambas áreas están valadas perimetralmente, presentan diferenzas de releve e son de gran superficie. Existe, ademáis, zonas de prado e xogos para o exercicio físico dos animais.
Esta iniciativa foi promovida polo Concello ante o notable incremento na cifra de cans de compañía existentes nas zonas urbanas. O obxectivo é que as mascotas teñan á súa disposición un espazo público amplo, seguro e con equipamento. Este proxecto supuxo un investimento próximo aos 35.000 euros, financiados integramente con fondos municipais.
