Participaron da Mesa, a concelleira de Muller, a directora do CIM, o xefe da Policía Local e o comandante de Posto da Garda Civil da Laracha
A Mesa de traballo sobre coordinación interinstitucional contra a violencia de xénero na que están representadas as forzas e corpos de seguridade reuniuse no Salón de Plenos da Casa do Concello da Laracha. Contou con representación municipal nas figuras da concelleira de Servizos Sociais, Sanidade, Muller, Emprego e Promoción Económica -Rocío López-, a directora do Centro de Información ás Mulleres (CIM) -Ana Aldao- e o xefe da Policía Local -Víctor Vilanova-, e tamén coa presenza do comandante de posto da Garda Civil da Laracha –Miguel Rodríguez-.
Esta foi a primeira reunión desta mesa sectorial que se leva a cabo desde xaneiro de 2020. A periodicidade trimestral da mesma non puido cumprise debido ás restricións por causa da pandemia do coronavirus.
Retomar as accións
A xuntanza comezou repasando os acordos da reunión anterior e revisando as ordes de protección. Tamén se abordaron as altas e baixas do programa ATENPRO, o servizo telefónico de atención e protección para mulleres que sofren violencia de xénero.
Ademais, realizouse un seguimento do convenio entre o Ministerio de Interior e o Concello que supuxera a incorporación do corpo da Policía Local da Laracha ao sistema de seguimento integral dos casos de violencia de xénero (sistema VioGén). Unha vez máis, o Concello da Laracha volve mostrar o seu agradecemento a todos os sectores profesionais representados nas dúas mesas sectoriais.
