A conselleira de Medio Ambiente, Territorio e Vivenda e o alcalde da Laracha asinaron o convenio
Xunta de Galicia e Concello da Laracha ratificaron o seu compromiso para cooperar na materialización das melloras da contorna do campo da feira de Paiosaco. A conselleira de Medio Ambiente, Territorio e Vivenda, Ángeles Vázquez, e o rexedor, José Manuel López, asinaron a colaboración. Nel recóllese un orzamento de máis de 130.000 euros para a execución desta actuación, que se licitarán en breve.
Nese sentido, a conselleira trasladoulle ao alcalde que xa deu instrucións para iniciar os trámites e poder publicar a licitación este mesmo mes. Os traballos permitirán crear uns espazos urbanos máis amables para os peóns, dotándoos dunha maior comodidade e seguridade.
Plan Hurbe
Cómpre recordar que esta iniciativa está incluída no Plan Hurbe, posto en marcha polo Goberno galego, hai máis dunha década. O obxetivo é axudar aos concellos na materialización de proxectos urbanísticos do seu interese. A conselleira destacou que, ao longo do actual exercicio, mobilizará unha partida de 7 millóns de euros para apoiar proxectos e iniciativas similares.
Así, a Xunta asume o 70% da actuación -neste caso concreto, son 92.105 euros-, mentres que a porcentaxe restante é achegada polas entidades locais –case 40.000 euros serán aportados por A Laracha-. Non obstante, ambas administracións comparten o obxectivo de crear, mellorar e humanizar as infraestruturas de uso público e colectivo.
