«O concello de Narón vai facer o posible para que haxa un campo de billarda no municipio»
O paseo marítimo de Narón, na beira norte do río Xuvia, foi o escenario da penúltima xornada da Liga Atlántica de Billarda na Conferencia Noroeste. David Corral e os seus compañeiros de Filloas de Sangue levaban preparando esta xornada moito tempo. O Concello de Narón colaborou coa Federación Galega DEPAU Modalidade Billarda cedendo e acondicionando as instalacións. Tamén, achegando os premios para toda persoa participante na xornada. Asistiu á entrega de trofeos, José Oreona, concelleiro de Deportes. «Sabemos que o concello de Narón vai facer o posible para que haxa un campo de billarda no municipio. Cousa que sería moi positiva para o noso deporte», informan desde a Liga.
Volveron a participar 2 equipos da provincia de Lugo e 1 da de Pontevedra, ademais dos 4 equipos da Coruña. Foron 49 persoas, das cales, 8 mulleres e 3 infantís. Esta temporada a participación do Noroeste (NOR) aumentou moito e a falta dunha xornada por disputarse a participación media está en 46,75 (contando con participantes das Rías Baixas (RIB))
Na Categoría Absoluta serían, por 11 décimas, 15 prazas para o NOR e 17 para as RIB. Ollo que falta a participación nas últimas xornadas por contar. Na Categoría Feminina, serían 4 prazas para NOR e 12 prazas para RIB. Aquí, tamén está por decidir esa praza que de momento corresponde ás RIB, por 7 centésimas. En fin, magnífica nova a do aumento vertixinoso da participación no NOR.
Resultados da xornada
Xan Rodiño de Lúa de Forza Sanxenxo ganou a xornada, seguido de Juancar e terceiro foi Charli, estes dous xogadores de Campo da Feira Paiosaco. Aroa ganou en feminina, segunda foi Geni, as dúas de Billardeiros Musicais Ribadeo, e terceira foi Merche de APB A Laracha. En Infantil primeira foi Aroa, segundo Xan González e Ramón González, os dous de Filloas de Sangue A Coruña. En equipos foi primeiro Campo da Feira de Paiosaco, segundo APB da Laracha e terceiro Billardeiros Musicais de Ribadeo.
