Ata o 11 de decembro permanece aberto o prazo para votar as fotografías na modalidade «redes sociais» a través da páxina de Facebook Turismo da Laracha.
Xa hai gañadores da modalidade “Xeral” da segunda edición do concurso de fotografía «A Laracha no obxectivo». O xurado valorou todas as imaxes presentadas atendendo a tres criterios:
- impacto visual
- calidade técnico-artística
- creatividade
Así o o xurado acordou outorgar o primeiro premio (dotado con 600 euros) á foto titulada Caión é luz, de Samuel López, unha imaxe aérea da península que conforma Caión tomada co obxectivo dun dron que sobrevoou a vila ao atardecer, xusto coincidindo co acendido das luces da iluminación pública.
Ademais o segundo premio (400 euros) foi para Reflexos, de Antonio Martínez, pola foto da praia de Caión na que se reflexa no mar a igrexa parroquial de Santa María do Socorro.
Para rematar, o terceiro premio (250 euros) concédese a Outono en Laracha, instantánea tomada por María Eugenia Pereira no paseo fluvial do río Anllóns na que destacan as cores do outono, a pasarela de madeira e, ao fondo, o muíño.
Aínda aberta a votación na modalidade “redes sociais”
Ata o domingo 11 de decembro calquera internauta pode votar polas súas imaxes favoritas accedendo á páxina de facebook Turismo da Laracha. Aquela fotografía entre as 22 presentadas que obteña máis “gústames” será a gañadora e o seu autor recibirá 250 euros.
O acto de entrega dos premios de ambas modalidades celebrarase o día 12 de decembro.
O xurado estivo formado por:
- Raúl Lorenzo, profesional do sector audiovisual
- Guillermo Iglesias, tesoureiro da Asociación de Profesionais de Turismo da Costa da Morte APTCM
