O Concello volve organizar unha nova excursión dirixida aos veciños do municipio maiores de cincuenta e cinco anos de idade, xubilados e pensionistas.
Nesta ocasión a proposta é unha excursión pola Sierra de Francia e o Valle del Jerte a realizar do 27 ao 31 de marzo.
O programa previsto consiste nunha viaxe en autobús, que partirá desde A Laracha e percorrerá lugares como Salamanca, La Alberca, Ciudad Rodrigo, Peña de Francia, San Martín del Castañar, Las Hurdes, Mogarraz, Candelario e varios puntos do Valle del Jerte.
Así, o prezo por persoa en habitación dobre (hotel de catro estrelas), réxime de pensión completa (almorzo, comida e cea) e incluíndo todas as visitas guiadas, entradas e seguro de viaxe é de 290 euros. O suplemento para os que escollan habitacións individuais é de 110 euros. O Concello financiará integramente o custe do transporte en autobús.
As persoas que cumpran os requisitos e desexen realizar a excursión deben preinscribirse dirixíndose ao departamento de Servizos Sociais, situado no edificio administrativo da Laracha. O prazo será do luns ao mércores da próxima semana (13, 14 e 15 de marzo)
Hai cincuenta prazas dispoñibles. No caso de que o número de persoas interesadas en participar sexa superior ás prazas ofertadas, para outorgalas realizaríase un sorteo público o xoves 16 de marzo ás 11:00 horas no Salón de Plenos.
Ademais, o Concello, organiza este programa cos propósitos esenciais de optimizar o tempo de lecer das persoas maiores ofrecéndolles actividades culturais para favorecer o envellecemento activo e fomentar as relacións sociais entre o colectivo.
