A enquisa á veciñanza da Laracha comeza nas parroquias de Cabovilaño, Caión, Coiro, Montemaior, Lestón e Torás
O Concello comezou a realizar unha enquisa para identificar as principais desigualdades entre mulleres e homes que a día de hoxe poidan existir no termo municipal. A Laracha conta cunha historia de máis de vinte anos de desenvolvemento de políticas de igualdade. Neste período creouse o Centro de Información ás Mulleres e desenvolvéronse tres Plans Municipais de Igualdade de Oportunidades entre Mulleres e Homes. O obxectivo principal da enquisa é obter unha diagnose da situación actual que sirva de base para coñecer a realidade e deseñar actuacións municipais para os próximos anos.
Para iso cóntase coa colaboración dos mozos e mozas que participan no programa de voluntariado xuvenil que organiza o Concello. Faino co apoio da Consellería de Política Social da Xunta de Galicia a través da Dirección Xeral de Xuventude, Participación e Voluntariado. As entrevistas á veciñanza comezaron hoxe e prolongaranse ata o 15 de setembro. O voluntariado visitará as parroquias de Cabovilaño, Caión, Coiro, Montemaior, Lestón e Torás.
Novo plan
Este proceso de elaboración do novo Plan de Igualdade de Oportunidades entre Mulleres e Homes conta tamén coa colaboración de todo o persoal do Concello. Eles participan na avaliación do plan de igualdade anterior. No pasado mes de agosto realizáronse presentacións do proxecto aos departamentos municipais de Servizos Sociais, Cultura, Deporte, Promoción Económica e Emprego, Urbanismo, entre outros.
