Cen persoas formaron parte desta iniciativa impulsada polo Concello e a Consellería de Promoción do Emprego e Igualdade
O programa integrado de emprego que se desenvolveu na Laracha concluíu deixando un balance de 50 persoas que lograron o obxectivo da inserción laboral. Outras 50, melloraron a súa empregabilidade ampliando a súa formación e competencias profesionais. Desde xeito superouse sensiblemente o propósito de inserción inicial, fixado no trinta e seis por cento.
O alcalde, José Manuel López Varela, e a directora xeral de Formación para o Emprego e Orientación, Zeltia Lado Lago, presidiron o acto de clausura celebrado na Casa da Cultura. Alí entregaron aos participantes os diplomas que certifican a asistencia e aproveitamento do programa.
O rexedor municipal mostrou o seu agradecemento “á Xunta de Galicia, aos participantes, ao equipo docente e ás empresas que permitiron facer as prácticas”. Pola súa parte, a directora xeral destacou o investimento de 250.000 euros da Xunta de Galicia para o financiamento do programa integrado de emprego da Laracha.
Este programa foi dirixido a cen laracheses que figuraban como demandantes de emprego no Servizo Público de Emprego de Galicia. Durante o mesmo, os participantes beneficiáronse das medidas de axuda á conciliación que puxo á súa disposición o Concello. Ademais, pola asistencia a cada acción formativa percibiron unha axuda económica diaria.
