A iniciativa forma parte do programa municipal en torno as actividades do 25-N contra a violencia de xénero
No marco do Día Internacional para a Eliminación da Violencia Contra as Mulleres, o Concello da Laracha organiza un concurso de vídeos en TikTok para concienciar sobre esta problemática social. A actividade é parte do programa en torno ao 25 de novembro. O obxetivo é promover a igualdade de xénero e, ao mesmo tempo, impulsar a creatividade das persoas participantes.
O Boletín Oficial da Provincia (BOP) da Coruña publica hoxe as bases do certame, que vai dirixido tanto ao alumnado do IES Agra de Leborís -a partir de 13 anos de idade-. Tamén, a calquera persoa maior de idade que estea empadroada no termo municipal da Laracha. A elección da rede social TikTok vén motivada pola súa popularidade entre o público adolescente e xuvenil.
Un único vídeo
Para participar é preciso enviar un único vídeo, individual ou grupal, a través do formulario da web municipal alaracha.gal entre o 19 e o 24 de novembro. A temática debe ser a establecida para o concurso, estar realizado na app TikTok, ter unha duración de entre un e tres minutos. Tamén, incluír o hashtag #alarachaunidafronteasviolencias.
Os vídeos subiranse ao Instagram @xuventudealaracha o 25 de novembro. Aqueles que obteñan máis “gústames” ata o 9 de decembro ás 10:00 horas serán os gañadores dos seguintes galardóns:
- 1º premio: 300 euros.
- 2º premio: 200 euros.
- 3º premio: 100 euros.
A relación das persoas gañadoras farase pública na web e nas redes sociais do Concello o día 12 de decembro.
