Os de postais e contos de Nadal van dirixidos ao alumnado dos centros educativos e o de escaparates, aos comercios
O Concello está a ultimar o contido do programa de eventos e actividades de Nadal. Contará con propostas para todos os públicos desde finais de ano e ata a Cabalgata dos Reis Magos. Unha vez máis, no marco deste programa haberá catro tradicionais concursos: os de contos e postais, o de panxoliñas e o de escaparates.
Panxoliñas
O certame de panxoliñas “María Angeriz Tuset” terá lugar o venres 30 de decembro a partir das 19:30 horas na Casa da Cultura da Laracha. Vai dirixido ás asociacións culturais, coros parroquiais e grupos do municipio. Están establecidas catro categorías de premios dotadas con 300, 250, 200 e 175 euros respectivamente. Todos os grupos teñen garantida unha achega de 200 euros polo feito de participar. Un dos propósitos esenciais deste evento é subvencionar a actividade que desenvolven as entidades.
Comercios locais
O concurso de escaparates alcanza a súa 27ª edición. Convídase a participar a calquera tipo de establecemento do termo municipal que dispoña de escaparate exterior. Repartiranse un total de 1.800 euros en premios entre as dúas modalidades: a valoración do xurado e o concurso que se realizará en Facebook.
Aqueles establecementos e locais comerciais que desexen participar deben inscribirse como data límite o 21 de decembro e manter o escaparate visible, adornado e sen modificalo ata o día 5 de xaneiro. Ademais, deberán achegar unha fotografía para poder participar no concurso de Facebook.
A valoración do xurado será o mércores día 29 de decembro a partir das 18:00 horas. Tendo en conta as diferenzas entre os produtos dos diferentes comercios, valorarase o esforzo realizado en cada traballo seguindo os criterios de creatividade, orixinalidade, iluminación e composición comercial. Os cinco mellor puntuados obterán os premios (500, 400, 300, 200 e 100 euros).
En Facebook
O concurso de Facebook farase por cuarto ano consecutivo. Na páxina do Concello da Laracha (https://www.facebook.com/ConcelloALaracha/) subiranse as imaxes de todos os participantes o 26 de decembro. As tres que teñan máis “gústame” o 3 de xaneiro ás 12:00 horas serán as premiadas (150, 100 e 50 euros).
Tanto no concurso de panxoliñas como no de escaparates, as bases e os formularios de inscrición estarán dispoñibles a partir do luns na web www.alaracha.gal.
Postales de Nadal
Por último, lembrar que os concursos de postais e de contos van dirixidos ao alumnado dos colexios Otero Pedrayo da Laracha, Alfredo Brañas de Paiosaco e CEIP de Caión. O certame de conto é para estudantes 5º e 6º de primaria. No de postais participan alumnos de infantil e de 1º, 2º, 3º e 4º de primaria, estando establecidas categorías de premios diferenciadas por grupos de idade. En ambos casos a valoración do xurado realizarase o 15 de decembro a partir das 11:00 horas na biblioteca municipal da Laracha. Os premios, como no 2021, consistirán en xogos e material educativo.
