Realizaranse intervencións no pavillón municipal e nas pistas de pádel
Comezaron a executarse as obras de mellora das instalacións do complexo deportivo municipal da Laracha, que contempla dúas intervencións. As actuacións principiaron a desenvolverse nas pistas de pádel, onde as obras proxectadas teñen unha triple finalidade. Por unha parte está a renovación do firme, contemplando tanto a reparación da soleira coa aplicación dun morteiro de resinas como a substitución do céspede artificial. Ademais, será ampliada a fachada de chapa que pecha as pistas pola súa parte superior. O obxectivo é aumentar a eficiencia enerxética, para o que será cambiado o sistema de iluminación existente por novos proxectores LED aptos para exteriores.
A outra intervención prevista terá por finalidade a conservación e mantemento do pavillón municipal do mesmo complexo deportivo. Consiste na renovación da cuberta e dos canalóns, incluíndo tamén o pintado dos muros tanto no exterior como no interior do polideportivo.
En total serán investidos 80.000 euros, dos cales 55.000 euros achegaranse polo Concello con fondos propios municipais. Os outros 25.000 serán financiados pola Secretaría Xeral Para o Deporte da Xunta de Galicia. O alcalde, José Manuel López Varela, e o concelleiro José Ramón Martínez Barbeito, acudiron ata o complexo deportivo para supervisar o inicio da execución dos traballos.
Control da seguridade viaria
A Policía Local da Laracha, no exercicio do seu labor de control da seguridade nas estradas do ámbito municipal, detectou nos últimos días oito condutores que deron positivo nas probas de alcohol e de drogas.
En concreto, foron interceptados tres condutores que arroxaron resultado positivo por consumo de substancias estupefacientes incompatibles coa condución, tales como cocaína, cannabis, anfetaminas e metanfetaminas. Outros cinco automobilistas superaron a taxa máxima permitida de 0,25 mg/L de alcohol en aire expirado. En dous deses casos os condutores superaron o triplo desta taxa permitida, polo que se instruíron dilixencias por posible delito contra a seguridade viaria.
A Policía Local reitera o perigo que supón conducir baixo os efectos do alcohol ou das drogas tanto para a persoa ao volante que incumpre a normativa como para os demais usuarios da vía.
