O novo obradoiro está dirixido a coidadoras de persoas dependientes residentes en zonas rurais
O Concello de A Laracha e a Fundación Mujeres desenvolverán un obradoiro presencial de apoio integral a coidadoras de persoas dependentes residentes en zonas rurais. Será presencial e constará de catro sesións a impartir os mércores de novembro. A inscrición é gratuíta e debe formalizarse nos servizos sociais municipais.
O feito de coidar a unha persoa en situación de dependencia implica unhas consecuencias sobre a calidade de vida das mulleres que desenvolven dita tarefa. En moitos casos ditas persoas, antepoñendo o coidado ás súas propias expectativas e proxectos de vida. Ven afectada a súa saúde, autoestima, o seu lecer e tempo libre. Pero tamén, a súa vida familiar, as relacións, o traballo e por tanto a súa economía. Para estas mulleres a responsabilidade case exclusiva do coidado das persoas dependentes supón unha ruptura co seu proxecto de vida persoal.
Conscientes desta situación, e para paliar estas consecuencias, o Concello e a Fundación Mujeres –coa colaboración da Deputación Provincial da Coruña– desenvolverán na Laracha un novo obradoiro presencial. Trátase de apoio integral a coidadoras de persoas dependentes residentes en zonas rurais que dará continuidade aos realizados no último ano tanto de xeito presencial como en liña.
Apoio e formación
A iniciativa é concibida como un recurso de orientación, acompañamento e apoio a nivel emocional, formativo, de activación persoal e social. Será un complemento aos recursos xa existentes de apoio á dependencia. Na metodoloxía do obradoiro primarán as actividades grupais dirixidas a reforzar as relacións sociais a través da interacción con mulleres que están na mesma situación.
A formación en materia de autocoidado, xestión emocional, habilidades de comunicación e autoestima pretende que as mulleres poidan exercer os labores de coidado dunha maneira máis saudable. Impartirase na planta baixa da biblioteca municipal da Laracha os catro mércores de novembro (días 4, 11, 18 e 25) en horario de 10:30 a 12:30 horas. Cumpriranse estritamente as medidas de prevención ante a Covid-19. A inscrición, que é gratuíta, debe formalizarse no departamento de Servizos Sociais chamando ao 981612811 ou acudindo con cita previa ao edificio administrativo da Laracha.
