O Concello xa iniciou o proceso de selección do persoal para o novo obradoiro de emprego que comezará a principios de ano
O Obradoiro de Emprego A Laracha V rematou co acto de clausura celebrado na Casa da Cultura da Laracha. José Manuel López Varela, e o delegado da Xunta de Galicia, Gonzalo Trenor, fixeron entrega dos diplomas ao alumnos traballadores.
Durante nove meses -ademais dos tres nos que a actividade cesou debido á pandemia- vinte persoas que se atopaban en situación de desemprego tiveron a oportunidade de aprender un oficio. Tamén de realizar obras en infraestruturas públicas de interese xeral para a cidadanía larachesa e obter unha remuneración económica. Dez alumnos realizaron a súa actividade na especialidade de carpintería de madeira. Outros dez, na de pintura industrial. As obras levadas a cabo consistiron na renovación da pasarela de madeira do paseo fluvial e melloras en instalacións municipais.
Agradecementos
O alcalde agradeceu á Xunta de Galicia a posibilidade de realizar este programa. Apuntou que “a colaboración entre as administracións é esencial para que os veciños teñan a oportunidade de formarse para aumentar as súas capacidades”. López Varela valorou as actuacións realizadas que cualificou como “un traballo feito para a cidadanía”. Así mesmo lembrou aos participantes do obradoiro que agora o Concello está á súa disposición no procedemento da busca activa de emprego. Por último, o rexedor municipal referiuse ao Obradoiro de Emprego A Laracha VI, que xa están en proceso de selección de persoal e que comezará a principios do ano que vén.
Pola súa parte, Gonzalo Trenor referiuse á “aposta importante que fai a Xunta de Galicia polos obradoiros de emprego” como método de formación adaptada ás necesidades das empresas. É ademáis, dirixida a mellorar a empregabilidade e a facilitar a inserción no mercado laboral. Neste sentido, achegou o dato de que a media de inserción está no sesenta por cen. O delegado da Xunta concluíu afirmando que “A Laracha ten obradoiros porque neste Concello se fan ben as cousas”.
