Na modalidade “Xeral” o primeiro premio será imaxe da felicitación de Nadal do Concello da Laracha
José Manuel López Varela, alcalde do concello, e a concelleira de Cultura e Turismo, Patricia Bello, fixeron entrega dos premios da primeira edición do concurso fotográfico A Laracha no Obxectivo. A inicitiva foi dotada cun total de 1.150 euros. Cada galardoado, ademais da gratificación económica, tamén recibiu unha copia impresa en cartón pluma da súa fotografía gañadora.
Na modalidade “Xeral” o primeiro premio (dotado con 500 euros) foi para Lúa chea polo santuario dos Milagres, de Antonio Fernández. A imaxe mostra o satélite sobre o campanario da capela. Ao atoparse o autor fóra de Galicia, recolleu o premio Mabel Varela, que leu un comunicado escrito polo gañador no que explicou o proceso de varios meses que levou a cabo para tomar a foto. Tamén quixo agradecer ao Concello pola iniciativa, que permite “poñer en valor todo o potencial turístico do municipio”. O alcalde avanzou que esa imaxe será empregada polo Concello para a felicitación de Nadal institucional deste ano.
No segundo posto (300 euros) acadou Estrelas de Caión, unha panorámica da vila feita por Iván Gómez Costa. O terceiro premio (150 euros) outorgouse a Agarimos á nosa costa, instantánea de Samuel López tomada cun dron e centrada na praia do Caracoleiro. Na modalidade “Redes Sociais” a imaxe gañadora foi Excepción, de Laura Liset Valdés González, unha posta de sol sobre o mar da praia de Caión. O premio é de 200 euros.
