O Concello da Laracha celebra e aplaude a autorización por parte do Consello da Xunta do convenio coa Consellería de Infraestruturas e Mobilidade, a través de Augas de Galicia
O Consello da Xunta autorizou hoxe o convenio de colaboración co Concello da Laracha para executar unha primeira fase de mellora na rede de abastecemento municipal. A Consellería de Infraestruturas e Mobilidade, a través de Augas de Galicia, cofinanciará a actuación nun 80% coa achega de 1.480.000 euros. O Concello da Laracha contribuirá ao financiamento do 20 por cento restante. Destinará 370.000 euros. Ademáis, comprométese a poñer a disposición os terreos. Pero tamén asume a realización das xestións para posibilitar a execución das obras e a recepción, mantemento e conservación das actuacións.
O grupo de goberno local elevara á sesión ordinaria do Pleno celebrada o pasado 30 de xullo este mesmo acordo que, tras ser aprobado pola Corporación, foi cualificado polo alcalde, José Manuel López Varela, como “potente” e que permitirá “mellorar a traída en todo o territorio”. As obras executaríanse entre os anos 2021 e 2022.
Obxecto da actuación
Así mesmo, o abastecemento do concello da Laracha presenta déficits derivados, fundamentalmente, da falta de presión de auga nalgunhas zonas e da falta de capacidade de almacenamento para facer fronte ás demandas de auga en época estival. Ademais, no futuro, desde a estación de tratamento de auga potable abastecerase ao parque empresarial da Laracha, o que fai que a actual infraestrutura hidráulica precise dunha ampliación.
Deste xeito, as actuacións obxecto deste convenio concéntranse, nesta primeira fase, na ampliación da estación de tratamento de auga potable, na construción dun novo bombeo e dun novo depósito de auga potable, que mellore o funcionamento da rede de abastecemento deste concello.
