As persoas que desexen ser usuarias de Xantar na Casa deben solicitalo nos servizos sociais municipais
O Concello da Laracha e a Consellería de Política Social da Xunta de Galicia aumentarán o número de usuarias do programa Xantar na Casa. A ampliación será de dez prazas para un total de trinta e cinco.
A finalidade de Xantar na Casa é garantir unha alimentación equilibrada e de calidade adaptada ás necesidades de cada un dos usuarios. Deben ser persoas maiores de 60 anos que teñan limitada a súa capacidade de autonomía persoal e que carezan de apoios que puideran suplir tal situación. Tamén, calquera persoa, independentemente da súa idade, que sexan dependentes e non teñan apoio familiar para a preparación dos alimentos.
A través deste programa os usuarios reciben os alimentos nos seus domicilios unha vez por semana. No caso de que non dispoñan deles, tamén se lles facilitarán os medios (microondas e neveira) para poder preparalos cada día dun xeito cómodo e sinxelo.
O servizo é prestado pola Xunta de Galicia a través do Consorcio Galego de Servizos da Igualdade e Benestar. É subvencionado pola Consellería de Política Social e tamén polo Concello da Laracha. O prezo diario do menú é de 6,27 euros, dos cales o usuario aboa unicamente 1,67 euros.
As persoas que cumpran as características e desexen ser beneficiarias do programa poden solicitalo no departamento de servizos sociais do Concello da Laracha, chamando ao 981612811.
