O alcalde e a directora de ADOS presentaron a campaña de verán de doazón de sangue
O alcalde da Laracha, José Manuel López Varela, e a directora da Axencia Galega de Sangue, Órganos e Tecidos (ADOS), Marisa López, presentaron onte no Concello a campaña de verán de doazón de sangue.
Segundo os datos achegados por ADOS, A Laracha é o concello de Bergantiños que presenta unha maior taxa de doazón. Conta con 45 por cada mil habitantes en 2020, superando en dez puntos a media comarcal e en dezaseis a media galega. Como dato global, no ano pasado realizáronse 508 doazóns nas unidades móbiles desprazadas ao termo municipal da Laracha.
A directora de ADOS afirmou que “Galicia está no terceiro posto estatal en taxa de doazón de sangue, soamente por detrás de Estremadura e Castela e León”. Sen embargo, apuntou a dificultade do verán con respecto a outros momentos do ano. “É unha época na que se rompen os hábitos, pero a pesar diso nós temos que continuar garantindo o abastecemento nos hospitais”. Por ese motivo recalcou a importancia desta campaña, agradecendo a solidariedade da cidadanía e o “apoio incondicional do alcalde”.
De cara o futuro, sinalou que o reto será “achegarse á xente nova”. Neste ano foi máis complicado debido á menor presenza de estudantes nas universidades por causa da situación sanitaria». Tamén apuntou que os grupos sanguíneos que presentan un menor volume de reservas e, por tanto, unha maior necesidade de doazóns no momento actual son os 0+, 0- e B+.
«Xesto altruísta da veciñanza»
Na oportunidade, o alcalde valorou “o xesto altruísta da veciñanza”. O rexedor considera que “para as diferentes administracións ten que ser unha obriga colaborar nestas campañas promovidas por ADOS para, entre todos, axudar a salvar vidas”.
Por iso López Varela concluíu facendo un chamamento á cidadanía para participar na campaña de verán. Se trata dun acto “plenamente seguro”, dixo. A unidade móbil de ADOS está hoxe na Praza do Concello de 10:00 a 14:00 e de 16:00 a 21:00 horas. Regresará xusto dentro dun mes, os días 20 e 21 de agosto. A finais de agosto está previsto que tamén se desprace ata Paiosaco e Caión. Pódese reservar cita previa para realizar a doazón na hora máis conveniente chamando ao teléfono gratuíto 900 100 828.
