A Consellería de Sanidade informou o 12 de febrero, á Axencia Española de Seguridade Alimentaria e Nutrición (AESAN) dunha serie de incumprimentos graves detectados nun control oficial realizado na empresa Lácteos Casa Macán S.L.. A situación non permite garantir a seguridade dos produtos alí elaborados.En concreto, trátase dunha alerta para quesos e manteigas elaborados en Casa Macan.
Como consecuencia, os servizos veterinarios de Saúde Pública da zona veterinaria de Lugo da Consellería de Sanidade suspenderon cautelarmente todas as actividades da industria; tamén interviron todos os produtos existentes na empresa láctea, ademais de ordenar a retirada das canles de distribución de todos os productos comercializados.
Están afectados por esta alerta todos os lotes dos distintos produtos de Casa Macán como manteiga cocida de vaca, queixo D.O. Arzúa Ulloa, queixo D.O, Tetilla, queixo D.O, Arzúa Ulloa curado, queixo barra Costeño e queixo galego en rebanadas.
Recoméndase ás persoas que teñan estes produtos que non os consuman e os devolvan ao punto de compra.
Segundo a información dispoñible ata o de agora, estes lácteos foron distribuídos en Galicia, Cataluña e Castela-A Mancha.
A Xunta de Galicia lembra aos consumidores que a suspensión temporal de actividade da empresa Lácteos Casa Macán, S.L., afecta, única e exclusivamente, a queixos e manteigas elaborados en Casa Macán, polo que os produtos do resto de marcas amparadas baixo as denominacións de orixe protexida “Queixo Tetilla” e “Arzúa-Ulloa” non están afectados.
O Goberno galego insiste en que a retirada dos produtos de Casa Macán fíxose de forma cautelar e que só afecta a esta queixería.
A Xunta de Galicia agradece o traballo que realizan os consellos reguladores de ambos selos de calidade, que vixían e controlan que os produtos se elaboren nas mellores condicións hixiénico-sanitarias e quede patentada a calidade dos mesmos.
Sinalar, por último, que para que a empresa afectada poida retomar a actividade, a autoridade sanitaria terá que levantar a medida cautelar e, para iso, deberase realizar unha inspección completa do establecemento co obxecto de comprobar que se emendaron todas os incumprimentos detectados e que xa cumpre todas as condicións esixidas na normativa sanitaria de aplicación para producir alimentos seguros.
