A Xunta de Galicia e A Laracha firmaron onte o convenio para comenzar as obras no municipio
A conselleira de Infraestruturas e Mobilidade, Ethel Vázquez, e o alcalde da Laracha, José Manuel López, asinaron o convenio para a mellora da rede de abastecemento do municipio por un investimento de 1,8 millóns de euros.
O acordo recolle a execución, nesta primeira fase, das infraestruturas hidráulicas prioritarias para facer fronte á demanda de auga no municipio en época estival. Tamén, dar servizo no futuro ao parque empresarial.
A Xunta apoiará ao Concello no desenvolvemento das súas competencias municipais cofinanciando a actuación nun 80%, coa achega de 1,480 millóns. As obras serán financiadas pola Unión Europea, no marco do eixe REACT UE do programa operativo Feder Galicia 2014-2020. Augas de Galicia tamén levará a cabo a contratación da execución, dirección e xestión das obras ata completar a súa finalización.
Pola súa banda, o Concello da Laracha contribuirá ao financiamento do 20%, cun investimento de 370.000 euros. Ademáis, comprometéndose a:
- someter o proxecto das obras a información pública
- poñer a disposición os terreos necesarios para levar a cabo as actuacións
- realizar as xestións pertinentes para posibilitar a súa execución
- recepcionar o mantemento e conservación das actuacións que se leven a cabo
Actuacións a executar
O abastecemento do concello da Laracha presenta importantes déficits derivados, fundamentalmente, da falta de presión de auga nalgunhas zonas e da falta de capacidade de almacenamento para facer fronte ás demandas de auga en época estival. Ademais, no futuro, desde a estación de tratamento de auga potable abastecerase ao parque empresarial da Laracha, o que fai que a actual infraestrutura hidráulica precise dunha ampliación.
Deste xeito, as actuacións obxecto do convenio asinado hoxe por 1,8 millóns, concéntranse, nesta primeira fase, na ampliación da estación de tratamento de auga potable, na construción dun novo bombeo e dun novo depósito de auga potable, que mellore o funcionamento da rede de abastecemento deste concello.
