No marco de «A Laracha activa e o mar de Caión» a xornada e visita á exposición son libres e gratuítas
O programa «A Laracha activa e o mar de caión» completarase o fin de semana cunha xornada de portas abertas sobre os oficios da pesca artesá. Comezarán o venres 23, de 19:00 a 21:00 horas no centro sociocomunitario con tres conversas. Pasado, presente e futuro do mar a cargo dos historiadores Marcos E. Amado e Fernando Patricio Cortizo e de profesionais do sector pesqueiro. Ademais, o sábado e o domingo poderase visitar a exposición en horario de 10:30 a 13:30 e de 17:00 a 20:30 horas. A asistencia ás conversas e a entrada para a visita á exposición son libres e gratuítas.
Tamén, permanece aberta a inscrición na camiñada que se vai realizar o sábado 24 10:30 a 13:30 horas. Partirase da Confraría de Pescadores e consistirá nun percorrido guiado de apenas catro quilómetros de distancia e de dificultade baixa. Anotarse é gratis e pode facerse vía telefónica (981 605001), presencialmente no Concello ou enviando un correo electrónico a turismo@alaracha.gal
Excelente acollida do público
As iniciativas desenvolvidas no marco deste programa medioambiental tiveron unha excelente acollida por parte do público. Nas tres quendas dos obradoiros de recollida do golfe e salgadura de peixe participaron preto de cincuenta persoas. Unha vintena asistiron á camiñada polo litoral da vila.
‘A Laracha Activa e o Mar de Caión’ é organizado polo Concello da Laracha en colaboración co Grupo de Acción Local do Sector Pesqueiro (GALP) da Costa da Morte. Pretende os obxectivos de reforzar os valores ambientais e patrimoniais do litoral caionés ao mesmo tempo que dinamizar o turismo.
Contidos do programa «A Laracha activa e O Mar de Caión»
