O Concello da Laracha lembra que existen servizos gratuítos de Punto Limpo e recollida a domicilio de lixo e voluminosos
O Concello detectou e procedeu á eliminación de tres verquidos incontrolados de lixo localizados a carón da rede viaria en Soandres e Erboedo e, tamén, no coto de Santa Marta.
En Soandres apareceron rodas e restos de materiais plásticos e metálicos na estrada de acceso ao núcleo de Silvoso. Nas inmediacións do núcleo de Longra en Erboedo, foron depositados restos dun vehículo e tamén residuos de obra. Pola súa parte, o verquido localizado no coto de Santa Marta consistía en colchóns e material téxtil.
O Concello da Laracha solicita a colaboración cidadá para evitar este tipo de situacións que poden causar danos no medio ambiente. Lémbrase que o Punto Limpo é un servizo municipal gratuíto para os usuarios que garante que a eliminación de lixo e residuos se realice dun xeito responsable. A finalidade é, ademási, que se aproveite o que poida ser reciclado e que os máis contaminantes reciban un tratamento especial.
As instalacións do Punto Limpo están a disposición de todos os veciños do municipio no Formigueiro, moi preto do casco urbano da Laracha. Seu horario é os luns de 15 a 20 horas, mércores e venres de16 a 20 horas e sábados de 9 a 14 horas. Ademais, existe un servizo de recollida de voluminosos a domicilio, tamén gratuíto para a veciñanza, que pode solicitarse chamando ao teléfono gratuíto 900 701120.
