O Concello da Laracha aproba o proxecto de expropiación dos terreos que albergan a carballeira de San Fins
Na sesión ordinaria da Xunta de Goberno Local elevouse a definitiva a aprobación do proxecto de expropiación dos terreos que albergan a carballeira de San Fins. As fincas sitúanse na parroquia de Montemaior. Fíxose unha vez superado o período de información pública ao que estivo sometido o documento durante un mes. E non se presentaron alegacións.
O proxecto delimita o ámbito territorial en canto a situación xeográfica, superficie e lindes, con descrición dos bens e dereitos afectados e a relación das persoas titulares dos terreos. En virtude do mesmo está previsto un investimento de 72.620,81 euros por parte do Concello con fondos propios. Será para adquirir unha superficie de 21.716 metros cadrados repartidos en doce parcelas catastrais. Están clasificadas no Plan Xeral de Ordenación Municipal (PXOM) como solo rústico de protección natural polo sistema de espazos libres. A taxación foi realizada mediante a capitalización da renda anual da explotación segundo o seu estado. A tramitación é polo procedemento de taxación conxunta.
Riqueza natural
Unha vez completado o procedemento de compra dos terreos, o Concello da Laracha ten proxectadas unha serie de actuacións. Todas elas dirixidas a poñelos en valor econatural e evitar o deterioro da carballeira de San Fins. Trátase dun ámbito de especial riqueza ao albergar árbores autóctonas –principalmente, carballos e castiñeiros-, nalgúns casos centenarias.
Os múltiples obxectivos céntranse na conservación do patrimonio natural municipal a través da creación dun espazo didáctico e de investigación sobre ditas especies autóctonas. Ademáis, proxéctase habilitar unha nova área de ocio e esparexemento econatural tanto para disfrute da cidadanía larachesa como para aumentar o potencial turístico do municipio.
