Este elemento do patrimonio arqueolóxico municipal e o terreo será incluído no Parque do Megalitismo da Costa da Morte
O menhir de Erboedo, tamén coñecido como marco da Anta ou pedra do ghicho e o terreo do entorno, xa é de propiedade municipal. O Concello da Laracha completou o procedemento de expropiación. Trátase dunha superficie de 4.651 metros cadrados cualificadas no PXOM como solo rústico de protección integral de patrimonio. Tamén califícase como solo rústico de protección forestal ou de montes. O propósito é preservar o seu valor histórico e levar a cabo actuacións para favorecer a súa conservación e acondicionar os accesos. Ademáis, será incluído no Parque do Megalitismo da Costa da Morte para poñelo en valor.
Situado nas inmediacións do núcleo de O Loureiro, o menhir de Erboedo é o único exemplar deste tipo do que se ten constancia na Costa da Morte. Alcanza os dous metros de altura, debuxa unha forma características de pedra apuntada de lados asimétricos e posúe calzos na base.
Cabe lembrar que o goberno local impulsara o Plan Especial de Patrimonio Cultural cos obxectivos de ofrecerlle a máxima protección a este menhir e a outros seis elementos do catálogo de patrimonio municipal. Eles son o Castro de Montes Claros, Castro da Pena, Croa de Santa Baia, as Torres de Cillobre e os dous Fornos dos Mouros de Soandres.
