En relación á denuncia dun grupo de veciños da parroquia de Golmar na que se reclamó a reparación dunha estrada no lugar de A Calvela tras unha tala de árbores na zona, o Concello da Laracha informa:
- A industria forestal é unha actividade importante no termo municipal da Laracha ao xerar oportunidades de emprego e económicas para os propietarios dos montes.
- Cada ano o Concello da Laracha recibe en torno a 300 solicitudes de particulares para a tala de árbores que, para ser autorizadas, entre outras cuestións deben constituír un aval para responder a posibles danos que se poidan producir nos equipamentos públicos.
- No caso denunciado na prensa por un grupo de veciños de Golmar, a empresa madeirista realizara todos os trámites administrativos necesarios, incluída a constitución do aval, e tiña autorización para levar a cabo os traballos.
- No día no que se realizou a tala, e debido ás condicións do terreo do camiño forestal sobre o que circulou a maquinaria pesada, un tramo da estrada do núcleo de A Calvela quedou cuberto de barro. A Policía Local emitiu un informe sobre esta circunstancia e a empresa, tras ser requirida polo Concello, realizou a limpeza da calzada apenas 48 horas despois dos traballos da tala. A día de hoxe a calzada está limpa, como pode apreciarse na imaxe que se acompaña e que foi realizada esta mañá (polo día 6/3).
- O Concello non detectou ningún dano nas estradas nin nas infraestruturas públicas, polo que non procede a retención do aval. Sen embargo, o Concello notificou á empresa madeirista a rotura da tubaxe dunha traída de auga particular, instándoa a reparar os danos provocados. Desta circunstancia tense constancia trala presentación dun escrito no rexistro municipal por parte do grupo de veciños da parroquia de Golmar.
- O Concello vela para que se cumpra escrupulosamente a normativa nas talas de árbores e lamenta que ditos traballos provoquen molestias puntuais á veciñanza. Ao mesmo tempo, o Concello pide compresión á cidadanía ante estas circunstancias que son inevitables ao levarse a cabo unhas actuacións destas características, que son imprescindibles na industria forestal.
