Estará en funcionamento do 15 de xuño ao 15 de setembro e por primeira vez o servizo contará con moto acuática de salvamento
Na sesión ordinaria da Xunta de Goberno Local acordouse adxudicar a Top Rescue S.L. o contrato dos servizos de salvamento, socorrismo, vixilancia e primeiros auxilios para a praia de Caión. O mesmo, estará dispoñible desde o 15 de xuño ata o 15 de setembro en horario de 12:00 a 20:00 horas.
Nos próximos tres meses serán un total de sete socorristas máis o coordinador xeral o persoal que se encargará a diario desas funcións para aumentar a seguridade dos bañistas. Tamén informarán sobre cuestión que afecte á praia e seu uso axeitado de acordo ás normativas e aos condicionantes establecidos pola Bandeira Azul.
Por primeira vez neste ano o servizo incorporará unha moto acuática apta para realizar traballos de salvamento. En todo momento estará presente canda menos un socorrista que posúa o título de patrón e que teña experiencia no manexo dese tipo de embarcacións. O Concello inviste 68.000 euros neste contrato, que é prorrogable para a temporada de verán do ano 2023. No vídeo de debaixo comezamos a gozar do verán en Caión…
Licencias urbanísticas
Na Xunta de Goberno Local tamén foron concedidas tres licencias urbanísticas. Dúas son para a construción de sendas vivendas unifamiliares nos núcleos de A Calvela (parroquia de Golmar) e A Fonte da Canle (Vilaño).
