A senda completará un itinerario de máis de 7 quilómetros na AC-552
Ethel Vázquez, conselleira de Infraestruturas e Mobilidade, xunto co delegado territorial da Xunta na Coruña, Gonzalo Trenor, presentou esta senda na Laracha. A actuación ten como obxectivo reforzar a seguridade e favorecer a mobilidade a pé dos veciños
Vázquez concretou que as empresas interesadas na execución deste novo itinerario teñen de prazo ata o 18 de xullo para presentar ofertas. A partir de aí realizaranse os trámites administrativos necesarios co obxectivo de iniciar as obras no outono para telas rematadas no verán de 2023. Contan cun prazo de execución de 10 meses. Esta actuación será financia no marco do programa do Fondo Europeo REACT-EU.
Detalles das obras
Segundo explicou a conselleira, habilitarase un itinerario de uso mixto, peonil e ciclista, pola marxe esquerda e en paralelo á estrada autonómica AC-552. En tres treitos concretos, onde hai vivendas nas marxes, a senda terá un ancho menor pero garantirase, en todo caso, un ancho de 1,80 metros.
O itinerario executarase en formigón coloreado, cor terriza, para unha maior integración na contorna. Disporase, ademais, unha franxa verde de separación que oscilará entre os 1 e os 2 metros, en función do ancho dispoñible, e elevada sobre a beiravía.
Detallou tamén que nas zonas de vivenda ou de negocios habilitaranse aparcadoiros en liña e tamén se mellorará a accesibilidade das paradas de autobús, dispoñendo máis espazo para os peóns e pavimento táctil diferenciado nas zonas de cruce e nas propias paradas. Ademais, coincidindo co cruce sobre o rego de Quenxe, executarase unha pasarela de preto de 16 metros de longo, con varanda metálica nun treito, para continuar o itinerario.
A intervención completarase con muros de cachotería para soster a senda en tres treitos; a disposición de rega para o mantemento da franxa axardinada; e a colocación de prismas de servizos, para a preinstalación de iluminación e telecomunicacións.
Outros itinerarios
Ethel Vázquez incidiu en que a senda entre Proame e O Cancelo dará continuidade aos itinerarios xa rematados en anos anteriores: entre O Cancelo e A Laracha, de 2 km, e entre A Laracha e Paiosaco, cun investimento total da Xunta de 3 M€. Referiu tamén que, no mes de decembro quedou rematada unha pequena senda peonil no Cancelo, pola marxe dereita da AC-552 na zona de acceso á autoestrada AG-55 e ao parque empresarial.
Para finalizar, enmarcou estas actuacións na aposta que vén realizando a Xunta polo fomento dunha mobilidade máis saudable e sostible e para favorecer desprazamentos a pé máis cómodos e seguros; unha aposta que se ten traducido xa na execución de 200 quilómetros de sendas e nun investimento de 50 millóns de euros.
