O Concello da Laracha ten activo desde a mañá do 7 de xaneiro un plan específico de mantemento das estradas de titularidade municipal
Pola ola de frío que se está deixando notar no territorio nacional, o Concello da Laracha mantén durante o fin de semana os traballos para estender sal nas estradas municipais. As actuacións ten o obxectivo de previr e minorar as situacións de risco na rede viaria derivadas das baixas temperaturas.
As intervencións estanse a levar a cabo de catro xeitos de maneira simultánea e complementaria. Por unha parte, o Concello contratou dúas empresas especializada no emprego de maquinaria para estender sal nas principais rúas dos máis de 600 quilómetros de lonxitude. Están facendo especial fincapé en todas as estradas de transporte escolar e priorizando as vías situadas en zonas de interior. Tamén, nos puntos de maior altitude, xa que son os que rexistran as temperaturas máis baixas. Realízase co propósito de evitar a formación de placas de xeo e, por tanto, facilitar a mobilidade e aumentar a seguridade na circulació.
Ao mesmo tempo, os empregados do servizo de limpeza da rede viaria. os operarios das cuadrillas municipais e voluntarios de Protección Civil están aportando sal nas beirarrúas dos núcleos urbanos. Especialmente nas zonas de maior circulación de persoas como os accesos ao centro médico da Laracha.
Despois de dous días de desenvolvemento desta campaña xa foron estendidas cinco toneladas de sal nas vías larachesas. Estes traballos manteranse tamén durante a fin de semana ante a previsión de baixas temperaturas tanto na xornada do sábado como na do domingo.
Corte da estrada de acceso a Quintáns
A vía que comunica a estrada DP-2404 desde O Formigueiro ata Quintáns (parroquia de Vilaño) foi pechada á circulación debido a que a acumulación de auga causada polos temporais dos últimos días provocou danos na súa estrutura. O acceso alternativo faise polo núcleo de A Ribela. O Concello xa iniciou os trámites para comunicar a situación a Augas de Galicia e solicitar a autorización para reconstruír a canalización pola que discorre o regato e proceder á reparación da estrutura da estrada.
