Os días 24 e 31 de outubro e 28 de novembro faranse tres rutas gratuitas de «A Laracha Activa»
O Concello pon en marcha un novo programa dirixido a todos os públicos no que se realizarán tres rutas guiadas. Todas elas son de dificultade media-alta. Dentro do proyecto «A Laracha Activa», a primeira andaina será o domingo 24 de outubro con «O sentir de Soandres». Na ruta de case 16 quilómetros parte desde o mosteiro de San Pedro. Coñecerase a riqueza arqueolóxica da parroquia visitando o dolmen do Forno dos Mouros. Tamén, a Pedra da Cabirta, as mámoas de Silvoso e do coto de Altamira e diferentes penedos graníticos de gran tamaño.
O domingo seguinte, 31 de outubro, será a quenda para a «Ruta de Caión: Porta da Costa da Morte». Trátase dunha ruta lineal de algo máis de 12 quilómetros que percorre os antigos camiños de peregrinación. Parte da Praza do Concello ata o Santuario de Nosa Señora dos Milagres, e remata na praza Eduardo Vila Fano de Caión. A última andaina será practicamente un mes despois. O día 28 de novembro, farase unha adaptación da ruta «360º Á Laracha». Trátase duns 10 quilómetros desde a capital municipal ata o miradoiro de Santa Marta.
Gratuitas e con bus de regreso
En todos os casos a inscrición é gratuíta e requírese cubrir o correspondente formulario na web municipal www.alaracha.gal desde mañá xoves día 13. O Concello porá a disposición dos participantes o transporte en autobús ata A Laracha para regresar tras rematar cada ruta. Tamén, acudir ao punto de partida na primeira delas, que é a única que non comeza na capital municipal.
