Os concellos da Laracha e Carballo queren poñer en valor o roteiro litoral Razo-Caión
O orzamento para rehabilitar o roteiro Razo-Caión alcanza os 60.000 euros. A proposta para facelo realidade preséntase conxuntamente entre o Concello da Laracha e o Concello de Carballo. A inciativa enmárcase ao abeiro da convocatoria da Vicepresidencia primeira e Consellería de Presidencia, Xustiza e Turismo do Fondo de Compensación Ambiental.
O proxecto deseñado e coordinado por ambas entidades locais ten por finalidade a posta en valor e a rehabilitación do espazo. No termo municipal da Laracha a actuación prevista é a mellora do firme da pista de Saldoiro. En Carballo proponse a renovación da pasarela existente no inicio da ruta en Razo e a mellora do camiño que discorre entre A Pedra do Sal e Leira.
A proposta foi aprobada na sesión ordinaria da Xunta de Goberno Local celebrada onte. Así mesmo, outras solicitudes de participación en convocatorias de axudas promovidas pola Xunta de Galicia.
Outra delas preséntase no marco da convocatoria de axudas para a mellora de infraestruturas, dotacións, instalacións e equipamentos vinculados á prestación de servizos municipais. Neste caso a finalidade é a reforma da cuberta e a renovación do pavimento do complexo deportivo da piscina municipal, cun proxecto dun orzamento que alcanza os 65.000 euros.
Ademais, o Concello da Laracha tamén pretende beneficiarse da liña de subvencións da Consellería de Política Social para a prestación de servizos no marco da Rede galega de atención temperá. A proposta do Concello é poder dispoñer dun logopeda, un psicopedagogo e un mestre de educación especial. A finalidade é realizar un programa municipal de estimulación dirixido a nenos de ata seis anos de idade.
