Estanse a substituír as ventás e as portas para aumentar o confort higrotérmico e mellorar a eficiencia enerxética do edificio da Insua
As instalacións do centro sociocultural da Insua, na vila de Caión, están a ser obxecto dunha intervención. As obras están dirixida a aumentar o confort higrotérmico do edificio para mellorar a súa eficiencia enerxética.
Os traballos consisten na substitución das ventás e das portas por outras novas que faciliten a ventilación e renoven a estética tanto interior como exterior destas instalacións de titularidade municipal. O centro sociocultural da Insua foi o local de referencia para a realización de actividades na vila ata a apertura, hai agora un ano, do centro sociocomunitario. A día de hoxe continúa sendo empregado polas diferentes entidades de Caión, tanto culturais como deportivas.
No día de onte o tenente alcalde, José Ramón Martínez Barbeito, e a concelleira de Cultura, Patricia Bello, acudiron ata Caión acompañados por persoal técnico municipal para interesarse polo desenvolvemento das actuacións. O proxecto suporá un investimento superior aos 30.000 euros a cofinanciar entre o Concello e a Consellería de Cultura, Educación, Formación Profesional e Universidades da Xunta de Galicia.
