A parroquia de Lestón foi protagonista da Xunta de Goberno local de xaneiro. Na sesión ordinaria celebrada a finais deste mes, adxudicaronse dous proxectos de mellora da rede viaria na parroquia de Lestón valorados en total en máis de 140.000 euros.
Estas actuacións afectan tanto á zona urbana como a vías rurais.
Así, na vila de Paiosaco renovarase o pavimento das rúas A Barreira, Blanco Amor, Cabana de Bergantiños, Ponteceso e Laxe. Os traballos inclúen a sinalización horizontal coa marcaxe das marxes da plataforma da calzada para aumentar a seguridade viaria.
Neste caso actuarase nunha distancia lineal duns seiscentos metros.
Por outra banda, o proxecto na zona rural afecta á estrada que comunica Paiosaco co núcleo de Lestón.
Tamén será renovado o pavimento para facilitar o tránsito dos vehículos. Está afectado polo proxecto un tramo de oitocentos metros máis outro ramal secundario de cen metros.
Ademais completarase o procedemento de adxudicación coa formalización dos contratos e, a continuación,estarase en disposición de iniciar as obras.
Licenza urbanística
Na mesma sesión da Xunta de Goberno Local concedeuse a licenza urbanística. Trátase do trámite para a construción, no parque empresarial dunha nave industrial de dúas plantas sobre rasante que se destinará á actividade de carpintería metálica.
Este proxecto beneficiarase dunha bonificación do 95% na cota do imposto sobre construcións, instalacións e obras (ICIO) en aplicación do artigo 6º da ordenanza fiscal número 17, que establece dito incentivo fiscal para as empresas que se implanten nese ámbito.
Fontes municipais mostran a súa satisfacción por conceder esta nova licenza urbanística que permitirá continuar enchendo de actividade o polígono industrial e crear novas oportunidades para a xeración de emprego no termo municipal.
