O Concello da Laracha inviste 15.000 euros na actuación desde Formigueiro ata Quintáns
O goberno municipal financia o proxecto de reparación da vía que comunica a estrada DP-2404 desde O Formigueiro ata Quintáns na parroquia de Vilaño. Dita vía permanece pechada á circulación desde o pasado mes de xaneiro. Foi debido a acumulación de auga causada polos temporais que provocou danos na estrutura á altura do coñecido como Rego das Vixías. Debido ao emprazamento das obras a realizar, foi preceptiva a autorización de Augas de Galicia para levalas a cabo.
Dito proxecto consiste na reparación da drenaxe transversal do camiño coa instalación de tubaxes que triplican o diámetro das anteriores. Tamén, a pavimentación do sector afectado e, ademais, aproveitouse para ampliar a anchura da calzada. O Concello inviste 15.000 euros nestas obras, necesarias para a posta en servizo da estrada á circulación rodada. Durante a execución dos traballos, o tráfico continuarase desviando polo núcleo de A Ribela.
Trámites urbanísticos
Por outra banda, o Concello continúa avanzando nos trámites urbanísticos necesarios para posibilitar a ampliación das instalacións do centro de día e fogar residencial da Laracha. A modificación do estudo de detalle da parcela que alberga dita infraestrutura superou o período de exposición pública sen terse presentado alegacións. Agora será o Pleno o órgano competente para elevar a definitiva a aprobación do documento. O obxecto deste trámite é a adecuación de certos parámetros urbanísticos ás determinacións do Plan Xeral de Ordenación Municipal. O fin último é adaptar o planeamento da parcela e establecer as condicións que se deberán cumprir no momento no que se redacte o proxecto de ampliación.
Ocupación das prazas
Actualmente o fogar residencial da Laracha ten cubertas 17 das 18 prazas ofertadas para persoas maiores dependentes. No centro de día o número de prazas é de 25,5, das cales nestes momentos hai cubertas 17. Neste caso trátase dun servizo de apoio ás familias no que se presta durante o día atención terapéutica integral e plural ás persoas maiores con dependencia ou en risco de padecela. O centro de día e o fogar residencial da Laracha forman parte da rede de centros do Consorcio Galego de Servizos de Igualdade e Benestar sendo xestionados, por tanto, pola Xunta de Galicia.
