Os proxectos afectan a 19 núcleos de poboación situados en 8 parroquias e investiranse 366.000 euros
Na última sesión da Xunta de Goberno Local foron adxudicados tres proxectos de mellora de rede viaria. Suman un investimento superior aos 366.000 euros. Inclúen renovacións da capa de rodadura dos vehículos, sinalización e recollida de pluviais en estradas localizadas en 19 núcleos de poboación de 8 parroquias.
O de maior orzamento (170.000 euros) afecta nove quilómetros de rede viaria da parroquia de Soandres. Contempla a mellora do pavimento nos lugares de O Priorato, A Abeleira, Boimir, A Insuaboa e Currelos de Abaixo. E, ademáis, en Condesuso, Condes, As Táboas e A Ponte da Veiga.
Outro dos proxectos localízase nas parroquias de Cabovilaño, Caión, Coiro, Lendo e Vilaño e alcanza un presuposto de 72.000 euros. Inclúe actuacións de renovación da superficie de rodadura e reforzamento da seguridade viaria. As actuacións se farán en Cardois (Cabovilaño), Goxán (Caión), A Painceira (Coiro), O Campo da Porta (Lendo) e Vilanova (Vilaño).
Por último, o que afecta ás parroquias de Lemaio e Torás suporá un investimento duns 124.000 euros. En Lemaio levarase a cabo unha ampla intervención consistente na mellora da capa de rodadura de dúas vías que comunican e discorren polos núcleos de A Estrada, Tuixe de Arriba, Tuixe de Abaixo e A Barreira. Presentan unha lonxitude total duns cinco quilómetros lineais.
Tamén inclúe a ampliación da rede de abastecemento de auga. En Torás a intervención prevista corresponde á estrada no núcleo de O Campo. Consiste no acondicionamento dos sobreanchos resultantes da construción de novos peches de parcelas particulares para o seu aproveitamento como espazos de aparcamento. Tamén será ampliada e mellorada a rede de recollida de augas pluviais.
Sete traballadores para Caión
A Xunta de Goberno Local tamén acordou concorrer á convocatoria de axudas da Deputación da Coruña dirixidas á contratación de persoal para a limpeza de praias marítimas. Ao abeiro de dito programa, o Concello presenta unha proposta para cofinanciar a incorporación de sete traballadores que prestarían servizo no areal de Caión durante os tres meses do verán.
