Os proxectos están centrados na mellora da rede de saneamento e de estradas municipais no ámbito rural
O Concello da Laracha saca a contratación nesta semana unha serie de proxectos dirixidos á mellora tanto da rede de saneamento de residuais como de estradas municipais situadas en zonas rurais. Están valorados nun total de 235.000 euros.
Na parroquia de Caión realizarase unha intervención en Xermaña coa finalidade de mellorar a rede de saneamento de residuais. Farase coa instalación dun bombeo como a superficie de rodadura en dous camiños públicos.
O resto das proxectos centraranse exclusivamente na mellora da rede viaria, con actuacións proxectadas nas parroquias de Caboviaño (estrada O Chamusco-Arén e núcleos de Nogán, As Ribas, A Teixoeira e Cardois.), Soandres (Bocixa e O Campo Medado), Vilaño (Vilaño Vello), Montemaior (A Ribeiriña e A Cerdeira), Lendo (accesos a Lista e Os Abelares) e Coiro (O Pereiro)
Os prazos de presentación das ofertas por parte das empresas interesadas iniciaranse unha vez estean publicados os pregos na Plataforma de Contratación del Sector Público. A execución dos proxectos será cofinanciada pola Deputación da Coruña ao estar incluídos no programa POS+.
Primeira dose da vacina
Por outra parte, a empresa Siad24 Galicia comunicou ao Concello que seu persoal en activo no municipio recibiu a primeira dose da vacina contra o coronavirus. En total foron administradas corenta vacinas ás dúas persoas coordinadoras do servizo, á axudante de coordinación e ás trinta e sete auxiliares de axuda a domicilio que están en activo. Estes corenta profesionais sociosanitarios atenden actualmente aos 135 veciños do Concello da Laracha que son usuarios do servizo de axuda no fogar.
