Investiranse 461.000 euros nos proxectos e actuarase en estradas de vinte e cinco núcleos de poboación de nove parroquias da Laracha
O Concello da Laracha adxudicará os contratos de execución de tres proxectos de mellora da rede viaria municipal. Faio despois de que a Mesa de Contratación clasificase as ofertas das empresas que concorreron ás licitacións.
O proxecto de maior orzamento (170.000 euros) afecta á parroquia de Soandres. Inclúe a mellora da capa de rodadura en estradas dos núcleos de O Priorato, A Abeleira, Boimir, A Insuaboa, Currelos de Abaixo, Condesuso, Condes, As Táboas e A Ponte da Veiga. Son doce as ofertas presentadas.
Outro proxecto localízase integramente na parroquia de Montemaior. Contempla intervencións de mellora do pavimento e da rede de recollida de augas pluviais nos puntos nos que así é necesario dos núcleos de O Batalo, Bardenlos, A Ferreira, Casas Longas, O Lorteiro e Pazos. Neste caso son once as empresas que optan á adxudicación e o presupostos ascende a 95.000 euros.
Presentáronse nove ofertas ao proxecto de mellora da rede viaria nas parroquias de Cabovilaño, Caión, Coiro, Lendo e Vilaño, que presenta un orzamento de 72.000 euros. Inclúe actuacións de renovación da superficie de rodadura e reforzamento da seguridade viaria en Cardois (Cabovilaño), Goxán (Caión), A Painceira (Coiro), O Campo da Porta (Lendo) e Vilanova (Vilaño).
Máis actuacións
Por último, o proxecto que afecta ás parroquias de Lemaio e Torás alcanza os 124.000 euros de presuposto e concorreron á licitación doce empresas. En Lemaio levarase a cabo unha ampla intervención que contempla a mellora da capa de rodadura de dúas vías que comunican e discorren polos núcleos de A Estrada, Tuixe de Arriba, Tuixe de Abaixo e A Barreira. Presentan unha lonxitude total duns 5.000 metros lineais. Tamén se contempla a mellora e ampliación da rede de abastecemento de auga.
En Torás a intervención prevista corresponde á estrada no núcleo de O Campo e consiste no acondicionamento dos sobreanchos resultantes da construción de novos peches de parcelas particulares para o seu aproveitamento como espazos de aparcamento. Tamén será ampliada e mellorada a rede de recollida de augas pluviais.
Entre os catro proxectos investiranse preto de 461.000 euros na mellora da rede viaria, sinalización e recollida de pluviais en estradas localizadas en vinte e cinco núcleos de poboación de nove parroquias.
