A Laracha activa e o mar de Caión inclúe actuacións de sinalización de roteiros, actividades medioambientais e a creación dunha pictoaplicación
O Concello da Laracha adxudicou o proxecto de promoción turística A Laracha activa e o mar de Caión que promove co apoio do Grupo de Acción Local do sector Pesqueiro (GALP) Costa da Morte. A iniciativa enmárcase na Estratexia de Desenvolvemento Local Participativo (EDLP), entidade colaboradora da Consellería do Mar da Xunta de Galicia.
O proxecto ten por obxectivo principal reforzar os valores ambientais e patrimoniais no litoral caionés. Para iso propóñense iniciativas dirixidas a mellorar a oferta turística e educativa vinculando e compatibilizando a práctica da actividade física co descubrimento dos espazos marítimos e costeiros. A proposta centrase nos valores medioambientais, paisaxísticos e históricos.
Cinco actuacións
A Laracha activa e o mar de Caión estrutúrase en cinco actuacións diferenciadas. Dúas consisten na sinalización de roteiros para realizar a pé. Un será o sendeiro A Lararacha-Caión que une a capital municipal coa vila costeira nun percorrido de doce quilómetros. Alí se colocarán sinais direccionais e paneis interpretativos con información sobre os principais puntos de interese patrimonial e medioambiental. O outro lugar de intervención é o Sendeiro de Saldoiro, o tramo do paseo marítimo de Caión que parte da Praza Eduardo Vila Fano e remata preto do límite co veciño municipio de Carballo. Este espazo conta co distintivo de Sendeiro Azul e forma parte da Rede Natura.
A terceira actuación consiste na posta en marcha dun programa medioambiental que proporá actividades a realizar con diferentes institucións, especialmente educativas. As mesmas va dirixidas a visibilizar a costa e o mar como recursos doutras cadeas de valor relacionadas coa economía (turismo, biotecnoloxía, etc). Exemplos disto serían programas de andainas, difusión dos oficios da pesca artesanal e xornadas de educación ambiental nos colexios.
A cuarta liña contempla a creación dunha pictoaplicación dirixida a persoas que presenten trastornos de comunicación na linguaxe oral. Así se facilitará a comprensión do territorio costeiro e do mar da Costa da Morte.
Por último, inclúese a asistencia técnica por parte de persoal especializado no sector turístico. Prestará asesoramento e coordinación e levará a cabo un seguimento de todas as actuacións que se desenvolvan no marco deste proxecto.
O proxecto A Laracha activa e o mar de Caión presenta un orzamento total duns 71.500 euros. Serán investidos coa fin esencial de potenciar e xerar sinerxías entre o turismo mariñeiro e turismo de natureza, cultural-patrimonial e deportivo.
