O programa inclúe catro días consecutivos de eventos gratuitos na Laracha, Paiosaco e Caión.
Hoxe comenzou a desenvolverse o programa do Mes do Libro que organiza o Concello coa colaboración da Rede de Bibliotecas Públicas de Galicia. O propósito é conmemorar o Día do Libro que se celebra o 23 de abril e fomentar a lectura entre os máis cativos.
- A proposta de hoxe, a primeira das catro que compoñen o programa, será co Mago Teto, que chega á biblioteca da Laracha co seu espectáculo 4.500 anos da incrible historia da maxia.
- Mañá será a quenda para A alquimista (a ciencia dos libros), a cargo de Cristina Collazo na biblioteca de Paiosaco.
- O venres no centro sociocomunitario de Caión, Teatro Gazafelhos porá en escena A máquina do tempo, unha peza de teatro dirixida a nenos a partir de cinco anos de idade na que se ilustra, dun xeito ameno e pedagóxico, a historia das civilizacións nunha aventura educativa creada a partir do humor.
Por último, o sábado na biblioteca da Laracha ofrecerase o contacontos para bebés (nenos de 0 a 3 anos de idade) Corochas a cargo de Xarope Tulú. O espectáculo combina a narración oral, a manipulación de obxectos e a música. Todos os espectáculos principiarán ás 18:00 horas, con entrada gratuíta para o público.
