A entrega dos premios será o mércores na Casa da Cultura
Os membros do xurado dos concursos de Nadal convocados polo Concello reuníronse na biblioteca municipal da Laracha para definir os premios. Valoraron todos os traballos presentados a ambos certames polos alumnos dos tres centros de educación infantil e primaria do municipio. Dito xurado estivo formado por técnicos municipais e representantes dos colexios CEIP Otero Pedrayo da Laracha, CEIP Alfredo Brañas de Paiosaco e CEIP de Caión.
Ao concurso de postais presentáronse tanto traballos individuais como colectivos. Nestes últimos casos realizados conxuntamente polos alumnos das aulas de educación infantil. Houbo tres categorías de premios diferenciadas por grupos de idade.
O concurso de contos mostrou a imaxinación e facilidade para a escritura dos participantes a título individual, tal e como establecían as bases do certame. Foi dirixido a alumnos do terceiro ciclo (5º e 6º) de educación primaria.
Os doce premios outorgados polo xurado serán entregados aos gañadores o mércores, 23 de decembro, na Casa da Cultura. Como medida de seguridade, e para evitar aglomeracións de persoas, citarase ás 12:00 horas aos gañadores dos premios grupais e ás 12:30 horas, aos individuais. Os agasallos consistirán en xogos e material educativo adaptado ás idades de cada un dos premiados.
Premiados no Concurso de Postais
Categoría A (educación infantil)
- Aula de 6ºA do CEIP Otero Pedrayo
- Aula de 4º e 5º do CEIP de Caión
- Aula de 4º do CEIP Alfredo Brañas
Categoría B (primeiro ciclo de educación primaria)
- Andrea Regueira Cotelo (2º do CEIP Alfredo Brañas)
- Adrián Cambón Andrade (2º do CEIP de Caión)
- Lucía Lamas Pérez (1º do CEIP Otero Pedrayo)
Categoría C (segundo ciclo de educación primaria)
- Noa González Pena (3º do CEIP de Caión)
- Adriana Lareo Balado (3º do CEIP de Caión)
- Román González Otero (3º do CEIP Alfredo Brañas)
Premiados no Concurso de Contos (dirixido a estudantes do 3º ciclo de primaria)
- Mauro Regueira Caamaño (6º do CEIP Otero Pedrayo) por O espíritu do Nadal
- Marcos Rodríguez Pérez (5º do CEIP Alfredo Brañas) por Una navidad diferente
- Zaira Lorenzo Rodríguez (5º do CEIP Alfredo Brañas) por Os xoguetes non teñen xénero
