Polos acordos tomados na comisión de seguimento ante a Covid-19, o Concello da Laracha compensará ao titulares dos postos pola su actividade limitada
A feira de Paiosaco será o domingo 1 de novembro. As actuais medidas sanitarias, impostas pola Xunta de Galicia, limitan a presenza de postos ao cincuenta por cento. Do mesmo xeito que noutras feiras nas que existiu a mesma restrición, o Concello da Laracha permitirá en exclusiva a instalación de postos de alimentación por tratarse de produtos de primeira necesidade.
A actividade que se desenvolve na feira de Paiosaco no primeiro e no terceiro domingo de cada mes é un motor económico fundamental para a vila e unha cita de especial relevancia para os comerciantes dos diferentes sectores.
Neste ano as medidas restritivas acordadas polas autoridades sanitarias debido á crise do coronavirus nalgúns casos impediron a celebración de xornadas de feira. E noutros, limitou o número de postos de venda ao cincuenta por cento.
Importe da taxa
O recinto feiral de Paiosaco conta con 470 postos de venda de 3×3 metros cadrados de superficie asignados a un total de 214 comerciantes. Para cada un deses postos a taxa anual é de 28,50 euros. Os trámites para a liquidación das taxas están delegados na Deputación Provincial da Coruña, que xa comezou e emitir os recibos e a envialos aos titulares dos postos.
Unha vez rematado o período de pago voluntario, o Concello estudará individualmente, caso por caso, compensar o importe da taxa. Tomaranse como referencia tanto os acordos das comisións municipais de seguimento do Covid-19, como tamén a situación daqueles sectores comerciais aos que non se lles permitiu exercer a actividade nas feiras polas restriccións. Nestes casos compensarase, tamén, a parte proporcional da taxa daquelas xornadas.
