Os traballos de poda comezaron no campo da feira de Paioaco e na Avenida Fisterra da Laracha
A empresa concesionaria do servizo de mantemento de zonas verdes iniciou a campaña anual de poda das árbores. Os traballos, inclúen a retirada e transporte das polas para a súa posterior eliminación. As tarefas comezaron a desenvolverse no campo da feira de Paiosaco e tamén na Avenida Fisterra da Laracha á altura das Torres de Cillobre.
Estes mesmos labores realizaranse, a continuación, en varios puntos da capital municipal. Por exemplo na prazas Maximino Canedo e Silverio Moreda, a que alberga a igrexa parroquial. Tamén na praza da Areosa en Vilaño, no entorno do museo de Golmar e noutras zonas públicas do municipio, tanto nos núcleos urbanos como nas parroquias rurais.
Deste xeito, ademais de comprobar que as árbores se atopan en bo estado de conservación, mellórase a estética nos puntos de actuación. Especialmente nas zonas urbanas, protexerase aos vehículos e aos viandantes de posibles desprendementos das polas. No caso do campo da feira de Paiosaco tamén se facilita o desenvolvemento da actividade comercial que alí se leva a cabo no primeiro e no terceiro domingo de cada mes.
Convenio coa cofradía de pescadores
José Manuel López Varela, alcalde da Laracha, e José Héctor Morgade Carracedo, Patrón Maior de Caión, rubricaron o convenio de colaboración da Confraría de Pescadores da localidade costeira. Foi nos mesmos termos que nos anos anteriores.
O convenio establece que o Concello da Laracha concede unha subvención nominativa de 5.000 euros, xa contemplada nos orzamentos municipais, dirixida a sufragar os custos do funcionamento e mantemento (gastos en persoal, limpeza, electricidade, etc.) do Arquivo da Pesca, museo que é propiedade da Confraría de Pescadores.
O Arquivo da Pesca foi creado para poñer en valor o rexistro histórico da Confraría, dignificar o oficio dos pescadores e divulgar a cultura mariñeira. Atópase no baixo do edificio do pósito, en pleno paseo marítimo de Caión. Alberga os fondos do arquivo e unha exposición permanente que percorre a historia e a cultura mariñeira da vila a través da actividade pesqueira. Por medio de documentos, obxectos e paneis explicativos pódese coñecer o pasado de Caión, desde os antigos baleeiros ata a época dourada da pesca no século XX.
