Tamén se realizou unha intervención no edificio anexo a pista que alberga os vestiarios
O Concello vén de completar a execución do proxecto de mellora da pista polideportiva de uso libre situada no lugar de O Vilar, na parroquia de Cabovilaño. A ampla actuación desenvolvida comezou cunha intervención no edificio anexo no que se sitúan os vestiarios, que foron repintados tanto no interior como nas fachadas exteriores.
Na propia pista os traballos consistiron na corrección de desperfectos en toda a súa superficie, que agora foi pintada completamente de cor verde, ademais de marcarse os campos de xogo das diferentes modalidades deportivas. Tamén foi renovada a malla do peche perimetral e os equipamentos (porterías e canastras).
Con esta completa intervención o Concello pretende potenciar o uso desta infraestrutura municipal como modo de promoción da práctica da actividade deportiva e, por tanto, dos estilos de vida saudables, especialmente entre a mocidade.
Traballos no Centro de Interpretación dos Muiños
O Obradoiro de Emprego A Laracha VI está a concluír as actuacións no entorno do Centro de Interpretación dos Muíños de Golmar. É unha das intervencións máis destacadas do programa. Os traballos desenvolvéronse en varias fases. Consistiron na conservación medioambiental da parcela municipal situada contigua á do museo. Por outra parte, a especialidade de carpintería e moble mellorou a balaustrada do hórreo e renovou o mobiliario urbano creados por eles mesmos no taller. Tamén realizou traballos de mantemento nas fiestras e porta de acceso ao museo. Para rematar a actuación, están a renovar o peche perimetral de madeira que bordea o recinto.
